يمكن عشان هي اخر رحلة ( قبل رجوعي مصر بأيام) فهي أكتر صورة واضحة بكل تفاصيلها في مخي
البدء في التجهيزات ( قبلها بشهور )ه
الفكرة بدأت من ماساكو - رفيقة السكن-
في احد الايام قبل نص التيرم الاخير و كملنا البحث و الحجز لها سوا. الطريف
ان احنا الاتنين كنا حابين جدا نروح كاليفورنيا بس ما كناش عارفين نروح
فين بالظبط هناك ( حيث انها ولاية كبيرة جدا).. يوم ورا يوم ( و بعد حوالي
اسبوعين) ابتدت الصورة توضح لنا خصوصا بعد ما سألنا كل الناس اللي نعرفهم
تقريبا (زي ما نكون عاملين استطلاع رأي) و دورنا علي الخريطة و استشرنا
المواقع السياحية علي النت .. اخيرا وصلنا لقرار اننا نزور سان فرانسيسكو و
لوس انجلوس
قعدنا
في أوضة واحدة منا و دورنا علي رحلة طيران كل واحدة علي " الكمبيوتر
الخاص بها" و بعد مقارنة الاسعار هنا و هناك ( و بعدين هنا تاني) لاقينا
رحلة مناسبة و كان سعرها معقول جدا ( اصحابنا الامريكان ما صدقوش السعر لما
قلنا لهم.. لأن الرحلة بالظبط من اقصي الشرق الي اقصي الغرب) المهم ماساكو
دفعت الحجز في ساعتها . التفصيلة دي هيبان اهميتها كمان شوية
بعدها بكام يوم (يمكن اسبوع أو اكتر) عملنا اجتماع قمة تاني عشان نحجز مكان البيات ..و بعد بحث مطوّل حجزنا و دفعت انا
الوقت
ده كان بقي قرب نهاية الترم و كنا احنا الاتنين مشغولين جدا فبنتقابل
بالعافية - رغم اننا عايشين في نفس الشقة - عشان نرتب الحاجات دي .. فكنا
ايام مثلا نتقابل في وسط اليوم في " قاعة الأكل" صدفة فنتفق علي ميعاد
نتقابل فيه (في بيتنا) عشان الترتيبات دي.. المهم بعد ما حجزنا الطيران و
السكن اتقابلنا في المطبخ في يوم ( حيث غالبا ما كنا نستمتع بالحديث و
الطبخ سوا) و وسط كلام عابر - اثناء شرب الشاي الاخضر الياباني- سألتني عن
الميزانية اللي انا رصداها للرحلة دي فقلت لها علي مبلغ (شامل كلللللل
حاجة) و هي - بخبرتها الواسعة في السفر حوالين العالم- وافقتني عليه
خرجنا
من المطبخ سعداء باتفاقنا المادي و ذهبنا لنضيف المبلغ اللي دفعته لحجز
السكن لتمن التذاكر - في اجندة ماساكو المحندقة- و كان اكتشاف ... احنا
الاتنين عدينا الميزانية من قبل ما حتي نخرج من بيتنا
No comments:
Post a Comment